Wingas Tui

Photo credit: Nancy A. Wright

Trimisi Wingas Tui spo sqofat yi hissa tu, de Gulmit sad xona yʉrti delimanen qiti vitk x̌e yem rasmev šixsivetk.

Bohori, June wist yi torix hayem sad xonae ra šawaranev tre liman vitk x̌e baqla xoi yʉrke putokve meṣ̌nev bat x̌etk x̌e xun sarev yow xuḍoyi baxṣ̌ x̌etk.

Yem rasmi ce digarven yiwretk ska tiwetk ki de June muy wingasay zroa’at γafč nʉqson x̌etk.

Photo Credit: Sajjad Ahmed Bari

Wingas nasl γafč wocne waja’n yʉrke fasli hamiša γafč nuqson vitk. Yʉrkev dretk, kəsetk x̌e yʉmjev x̌etk, gidimi tumer ne tiwetk, neye tumer vitk, čhizerki hada waxt suriγ̌eṣ̌ vitey, γribiγ̌i be tiwetk. X̌ʉ wanj setk x̌akerev aska xalgve yʉrke ṣ̌apiken x̌ʉ wanj setk x̌etk.

Hadem rasmi xilifa yan baf fasl woz kamen kam nuqsoniγ̌e du’o čhilgetk, can bišxav xalgve de x̌ʉ wundre mʉlʉng semen x̌etk, wingasištev can wʉṣ̌etk, yavri sʉδʉyetk ki yowi xalg x̌e yanev skə faslve ne xmetk.

Yez wʉdgi yem rasm niṣ̌etk. Wingasve nasli b niv tumer nast čizer ki ne sirf zave ce tumbuken yav weṣ̌ovd, balki ṣ̌korive te miltiqen ṣ̌kor kert x̌e wingasve x̌ʉ jay lekert. Xalgve xun x̌ak dustan sʉrʉng kert yow sebabən be wingas ve x̌ʉ jay lekert.

Wingas tui’e rasme ska bə nṣ̌etk ki KKH road ce vitey, Čhinave sʉrʉng kert,  xalgve ra x̌ʉ faslev zer istimol kert wingasve yow yit x̌e mertive, yow sebabən be wingas nasl kam vitay. Yez wudgi də Gojal wingas nasl γafč̣ nast, wuzayen zumanəp yem nasl yitko naṣ̌t.

Qdim xalgištev oqil tiwetk, yave wingase ṣ̌kor ne x̌etk balke yave fasl bačat x̌etk čhizer ki wingasve nasl nʉqson me wost. Yaštev nəjoyetk tiwetk magam qʉdrat nezomev baf dišetk, chizer ki qʉdrat də yi nezomeṣ̌ ki xrobiγ̌ caren, caneṣ̌ di digar nezoməv be xrobiγ̌ wizit.

Sakep ko woz č̣iz nusun dušma.